Rapa e chiuda, chiuda e rapa
malanova chi male i capu
Cà ognunu dicia a sua
e i fricati simu nua
Nua poveri guagliuni
c'amu i sente si canzuni
di chin' è pi' l'apertura
chini invece pi' a chiusura
"A scola ha d'essere difesa
nun pò essere sospesa"
dicia u tale deputatu
a chini l'ha intervistatu
È pu' scopri ca u saputu
ara scola nun c'è jutu
tinni accorgi i cumu parra
congiuntivi nunn' incarra
Na matina u presidente
ca di funzione fà u facente
s'aza curu pede stuortu
ed allura hai stare accuortu
Ca si chiuda dintra a stanza
e ti sfurna n'ordinanza
e si l'offese puru in rima
c'hannu scrittu u juornu prima
Tante mamme supra i post
iddru a cede nunn'è dispostu
Pu' arriva a sentenza
pi' ra scola di Cusenza
Di chir'atru presidente
e chire mamme su cuntente
Dintra tuttu su casinu
ti lu dicia nu cretinu
Iu tiegnu l'impressiune
ca a tutte si pirsune
d'a scola veramente
nun linni frica propriu nente
Pietro Russo